ଭୁବନେଶ୍ୱର: ସମ୍ପ୍ରତି ରାଜ୍ୟରେ ଘଟିଥିବା ଭୟଙ୍କର ବନ୍ୟାରେ କ୍ଷତିଗ୍ରସ୍ତ ହୋଇଥିବା ପରିବାରମାନଙ୍କ ପାଇଁ ଓଡ଼ିଶା ସରକାର ବଡ଼ ଘୋଷଣା କରିଛନ୍ତି। ସୋମବାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବନ୍ୟା ପୀଡ଼ିତଙ୍କୁ ପ୍ରାରମ୍ଭିକ ପର୍ଯ୍ୟାୟରେ ୧୧୦ କୋଟି ଟଙ୍କାର ସହାୟତା ପ୍ୟାକେଜ୍ ପ୍ରଦାନ କରିବାକୁ ଘୋଷଣା କରିଛନ୍ତି। ଏହାସହ ଜିଲ୍ଲା ପ୍ରଶାସନକୁ ବିଳମ୍ବ ନକରି ଯୋଗ୍ୟ ହିତାଧିକାରୀଙ୍କ ପାଖରେ ସହାୟତା ପହଞ୍ଚାଇବାକୁ ନିର୍ଦ୍ଦେଶ ଦେଇଛନ୍ତି।

ସରକାରୀ ସୂଚନା ଅନୁଯାୟୀ, ଏହି ଆର୍ଥିକ ସହାୟତା ବନ୍ୟା ଯୋଗୁଁ କ୍ଷତିଗ୍ରସ୍ତ ହୋଇଥିବା ଘର, ଫସଲ ଏବଂ ପଶୁଧନର କ୍ଷୟକ୍ଷତିକୁ ଦୃଷ୍ଟିରେ ରଖି ପ୍ରଦାନ କରାଯିବ। ବନ୍ୟାରେ ଅନେକ ଜିଲ୍ଲାର ହଜାର ହଜାର ପରିବାର ଘରବାଡ଼ି, ଚାଷଜମି ଓ ଜୀବିକା ହରାଇ ବିପର୍ଯ୍ୟସ୍ତ ଅବସ୍ଥାରେ ଥିବାରୁ ସରକାର ଏହି ପଦକ୍ଷେପ ନେଇଛନ୍ତି।

ମୁଖ୍ୟମନ୍ତ୍ରୀ କହିଛନ୍ତି, ବନ୍ୟା ପରିସ୍ଥିତି ସମୟରେ ଉଦ୍ଧାର କାର୍ଯ୍ୟ ପାଇଁ ରାଜ୍ୟ ସରକାର ପୂର୍ବରୁ ୨୬ କୋଟି ଟଙ୍କା ମୁକ୍ତ କରିଥିଲେ। ଏହି ଅର୍ଥରେ ଉଦ୍ଧାର କାର୍ଯ୍ୟ, ଜରୁରୀ ତ୍ରାଣ ବଣ୍ଟନ ଏବଂ ବନ୍ୟା ପ୍ରଭାବିତ ଲୋକଙ୍କୁ ତୁରନ୍ତ ସହାୟତା ଯୋଗାଇ ଦିଆଯାଇଥିଲା। ବର୍ତ୍ତମାନ ଘୋଷଣା ହୋଇଥିବା ୧୧୦ କୋଟି ଟଙ୍କା କେବଳ ପ୍ରାରମ୍ଭିକ ସହାୟତା ବୋଲି ମୁଖ୍ୟମନ୍ତ୍ରୀ ସ୍ପଷ୍ଟ କରିଛନ୍ତି। ବନ୍ୟାରେ ହୋଇଥିବା ପ୍ରକୃତ କ୍ଷୟକ୍ଷତିର ଆକଳନ ପାଇଁ ବିଭିନ୍ନ ଜିଲ୍ଲାରେ ସର୍ଭେ କାମ ଚାଲିଛି। ସର୍ଭେ ରିପୋର୍ଟ ସମ୍ପୂର୍ଣ୍ଣ ହେବା ପରେ କ୍ଷତିର ପରିମାଣ ଅନୁଯାୟୀ ଯୋଗ୍ୟ ପରିବାରମାନଙ୍କୁ ଅତିରିକ୍ତ ଆର୍ଥିକ ସହାୟତା ପ୍ରଦାନ କରାଯିବ।

ସରକାର ଜିଲ୍ଲା ପ୍ରଶାସନକୁ କ୍ଷୟକ୍ଷତିର ଆକଳନ କାମ ଶୀଘ୍ର ଶେଷ କରିବା ସହ ଯୋଗ୍ୟ ହିତାଧିକାରୀଙ୍କୁ ଯଥାଶୀଘ୍ର ସହାୟତା ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି। ବନ୍ୟାରେ ପ୍ରଭାବିତ ପରିବାରମାନଙ୍କୁ ସ୍ୱାଭାବିକ ଜୀବନକୁ ଫେରାଇ ଆଣିବା ଏବଂ ସେମାନଙ୍କ ଆର୍ଥିକ ଭାରକୁ କମାଇବା ପାଇଁ ସରକାର ସମସ୍ତ ପ୍ରକାର ସହଯୋଗ କରିବେ ବୋଲି ମୁଖ୍ୟମନ୍ତ୍ରୀ ଆଶ୍ୱାସନ ଦେଇଛନ୍ତି।